اشفاق احمد

کچھ لوگ ہر وقت اور ہر گھڑی سچ بولنے کا دعویٰ کرتے ہیں اور سچ کو ریزگاری کے طور پر استعمال کرتے رہتے ہیں، ایسے لوگ لپاٹئے ہوتے ہیں ۔ سچ تو ایک بہت ہی بڑا دَھن ہے ۔ چھپا کر رکھنے والا ۔ یہ دولت تو سینت کر رکھی جاتی ہے ۔ اور اشد ضرورت کے وقت استعمال میں لائی جاتی ہے ۔

اشفاق احمد بابا صاحبا 602

ایک دفعہ کسی بزرگ نے دیکھا کہ  بغداد کی دانہ منڈی کے باہر ایک پتھر کے اوپر شیطان بیٹھا رو رہا ہے تو بزرگ بڑے حیران ہوئے ۔ وہ اس کے قریب گئے ، اور کہنے لگے کہ ابلیس کیا ہے تُو رو رہا ہے ؟ اس نے کہا جی ، میرا بہت برا حال ہے۔ انہوں نے کہا ، نہ بھئی نہ ، تُو تو  نہ رو ۔  تمہیں تو اتنے کام بگاڑنے ہیں لوگوں کے ۔ اگر تُو ہی رونے لگ گیا تو کیا ہوگا؟ اس نے کہا ِ بابا جی میرا دکھ۔ انہوں نے کہا کیا دکھ ہے ؟ کہنے لگا کہ جی میرا دکھ یہ ہے کہ میں اچھا ہونا چاہتا ہوں ، اور مجھ سے ہوا نہیں جاتا ۔  بڑی کمال کی بات کی اس نے ۔ چاہیے یہ کہ ہم ہونے کی کوشش کریں ، یہ خواہش تو کریں کہ ہم اچھے ہو جائیں تو اس سے بڑا فرق پڑ جاتا ہے ۔ ہماری بات تو ہوتی رہتی ہے گفتگو بھی ہوتی رہتی ہے ، لیکن ہم روئے کبھی نہیں ۔ ابلیس ہم سے بہتر تھا کہ سچ مچ رویا ۔ وہ بازی لے گیا ۔
اشفاق احمد زاویہ  اندر کی تبدیلی صفحہ 83

ہر شخص کو آج کے اندر داخل ہونے کی دعوت ہے ۔ ہم سب حال کے اندر بیٹھے مزے لے رہے ہیں ۔ نہ ماضی کی یاد ہے نہ مستقبل کا خوف ۔ آج کے اندر رہنا اور آج میں داخل ہونا صاحبِ حال ہونا ہے ۔ ماضی مستقبل کو چھوڑ کا عطا کردہ حال میں رہنا ۔ کچھ لوگ مستقبل کے بارے  میں فکر کر کے اپنے حال کو تباہ کر لیتے ہیں ۔ کچھ ماضی کو یاد کر کے حال سے لطف اندوز نہیں ہوتے ۔ پھر چند سال بعد اسی گذرے حال کو کو یاد کرنے لگ جاتے ہیں  ۔ 
اشفاق احمد بابا صاحبا صفحہ 539

جب کوئی احمق شخص آپ سے کسی رائے کا طلبگار ہوتا ہے تو اس کی آرزو یہ ہوتی ہے کہ آپ اس کو وہی رائے دیں ، جو اس کے ذہن میں ہے ۔ 
اشفاق احمد بابا صاحبا صفحہ 547

بابا جی نے پوچھا  " ایک تیز رفتار گھوڑا ایک سست رفتار گھوڑے سے دس گنا اچھا کیوں ہوتا ہے "۔  وہ اس لیے سرکار چھوٹے صوفی نے کہا  " اس کی رفتار سست رو گھوڑے سے دس گنی ہوتی ہے " ۔ شاباش ! لیکن اگر وہ اپنی راہ سے بھٹک جائے تو پھر وہ دس گنا تیزی سے بد راہ پر بھی نکل جاتا ہے ۔ بابا جی نے کہا۔   ہاں جی یہ تو ہے سرکار  ۔  لیکن ایک بات نہ بھولنا بچہ کہ جب اس تیز رفتار راہوار کو یہ معلوم ہو گیا کہ وہ غلط رستے پر آگیا ہے تو پھر وہ دس گنا تیزی سے سر پٹ بھاگ کر صحیح منزل کی طرف بھی نکل جائے گا ۔ یہی حال انسان کا ہے ۔ جب ایک پاک دل انسان نادم ہوتا ہے اور اپنے کیے پر شرمندہ ہوتا ہے تو تو اپنی منزل اس تیزی سے دوبارہ حاصل کر لیتا ہے ۔ لیکن سست رو آدمی سے یوں نہیں ہوتا ۔  جو پاک کا ساتھ دیتا ہے وہ پاک ہو جاتا ہے ۔ 
اشفاق احمد  بابا صاحبا صفحہ 402

ہم اپنے گھروں کی صفائی کا خاص خیال رکھتے ہیں ۔ کھڑے ہو کر صفائی کراتے ہیں ۔ کونے کھدرے کرید کرید کر صاف کرواتے ہیں ۔ الماریاں ، ڈبے ، درزیں ، میزیں سب کو جھاڑا تھرکایا جاتا ہے ۔  عین اسی طرح ہم کو اپنے وجود کی صفائی بھی کرنی چاہیے ۔ اس کو کسی دوسرے سے صاف نہیں کرایا جا سکتا ۔ اسے خود ہی جھاڑو دے کر صاف کیا جاتا ہے ۔ اندر کئی ڈبے ایسے ہیں جو ہم نے کبھی کھولے  ہی نہیں ۔ کچھ گمان ایسے ہیں جن کو ویسے کا ویسا ہی بند کر رکھا ہے ۔ ان بند ڈبوں اور گمانوں اور بد گمانیوں کے اندر عجب طرح کی بدبو پیدا ہو گئی ہے ۔ پھر کچھ بولے ہوئے جھوٹوں کے خالی لفافے اور شیشیاں ہیں ۔ ان سے عجیب طرح کی ہمک آرہی ہے ۔ سینے کے بڑے صندوق میں کچھ نفرتیں ہیں جن میں اب پہلے کے مقابلے میں اضافہ ہو گیا ہے ۔ ان کا صفایا کرنا یوں مشکل ہے کہ ان میں ٹڈیاں ، جھینگر ، اور پسو پیدا ہو گئے ہیں ۔ اگر آپ یہاں دوائی پمپ کریں گے تو وہ شخصیتیں بھی کیڑے مکوڑوں کے ساتھ مر جائیں گی جن کو آپ نے نفرت کے لیے پالا ہوا ہے ۔ اس لیے بڑا صندوق اوندھا مار کر اسے زور سے تھپتھپانا پڑے گا ۔ پھر اپنی یادوں کی تہیں لگا کر اندر کپڑا پھیر کر صفائی کرنی…

اصل میں آج تک میرے سارے کام انسانوں نے ہی کیے ہیں اور اللہ تعالیٰ کے لطف بے پایاں اور خیرِ کثیر کے مجھ تک پہنچنے کا سامان ہمیشہ بندوں نے ہی کیا ہے ۔ بیماری میں میرا علاج کسی انسان نے کیا ۔ با عزت طور پر بری کسی انسان نے کیا ۔۔۔۔۔ نعمتیں ہمیشہ بندے ہی اٹھا کر ، دھو کر ، کاٹ کر ، سجا کر لائے ۔ جب اللہ نے مجھے خوش کرنا چاہا تو لوگوں سے ہی تالی بجوائی ۔ جب مجھے محبت عطا کرنی چاہی تو کسی شخص سے ہی مجھے جپھی ڈلوائی ۔ جب میں نے سفر کا ارادہ کیا تو ایک بندے کو ہی میرا پائلٹ بنایا ۔ مجھے پیسوں کی ضرورت پڑی تو  پے کلرک نے ہی مجھے پیسے لا کر دیے ۔ لیمن جوس مجھے ہمیشہ ایئر ہوسٹس نے پلایا ۔ اور میاں محمد بخش صاحب کے شعر مجھے بندے نے ہی سنائے ۔ اس کا فضل اور اس کا کرم ہمیشہ مجھے کسی انسان کی معرفت ہی پہنچا ۔ اشفاق احمد از بانو قدسیہ  مردِ ابریشم صفحہ 64

لوگوں کے ساتھ میل جول رکھنا ، اور ان کی ضرورتیں پوری کرنا ہی عبادت ہے ۔ وہ آپ کی محبت سے اور شفقت سے محروم رہیں گے تو معاشرے میں کال پڑ جائے گا ، اور آپ کی ضرورتیں بھی رُک جائیں گی ۔  صرف منہ سے بات کر کے لوگوں  کی خدمت نہیں ہوتی اس میں عمل بھی ہونا چاہیے ۔ ہمارے جتنے بھی ادیب اور شاعر تھے ، عملی زندگی بسر کرتے تھے ۔  امام غزالی پڑھنا لکھنا چھوڑ کر صاحبِ مال ہوئے  لوگوں سے ملے جلے ۔ شیخ اکبر ابنِ عربی ، فرید الدین عطار،رومی ادہر ہندوستان میں داتا صاحب ، معین الدین چشتی ، حضرت بختیار کاکی یہ سب لوگوں کے کام کرتے تھے۔ مخلوقِ خدا کے کام آتے تھے ۔ ان کی بہتری کے لیے ان کے ہاتھ بٹاتے تھے ۔ کیونکہ یہ حضور کی سنت تھی اور یہ سب لوگ اس سنت پر ہی عمل کر کے آگے بڑھ سکتے تھے ۔ اشفاق احمد بابا صاحبا صفحہ 401

جہاں تک ممکن ہو ، ہلے گُلے ، خوش فکری اور خوش طبعی کی محفلوں سے گریز کریں ۔ ایسی محفلوں سے اجتناب کریں جہاں لوگ ایک دوسرے کو ذلیل کرنے اور ان کی ٹانگ کھینچنے کے لیے جمع ہوتے ہیں ۔ جہاں لوگ دوسروں کا ٹھٹھا  اڑانے اور دوسروں کی تضحیک کرنے اور اوپر سے تالیاں بجانے کے لیے اکٹھے ہوتے ہیں ۔  دوستی کے جھوٹے دعوے  اور یگانگت کے کوڑے بھرم رکھنے کا عکس مہیا کرتے ہیں ۔ ایسے لوگوں کی تحریروں سے ان کی کتابوں اور رسالوں سے گریز کریں ۔ ہاں اگر آپ کو یہ یقین ہو کہ آپ اپنے مسلک پر سختی سے کاربند ہیں تو یہ دیکھنے کو کہ ان دنیا داروں کے درمیان کیا ہو رہا ہے ان کی تحریریں دیکھ لیں مگر صرف معلومات حاصل کرنے کے لیے ۔ اخبار تفریح اور معلومات کا ذریعہ نہیں ہیں ، یہ عقوبت خانے اور شاہی قلعے ہیں جو صبح ہی صبح آپ کو ٹکٹکی پر کس لیتے ہیں اور پھر دن بھر آپ کو درے مارتے ہیں ۔ اسی طرح ریڈیو اور ٹی ویسے بھی اجتناب کریں ۔ ان کے گانے اور ان کے اعضائے بدن کے کرب اور کسرت سے بھی پرہیز کریں ۔ اور جس بدنی دکھ میں یہ رقص کرتے ہیں اس سے عذر کریں ۔ وہ بظاہر بڑا لذیذ  نظر آتا ہے مگر اندر کرب سے بھرا ہوا ہے ۔ کبھی ان کے سگریٹ…

انسانی ذہن ہمیشہ بطخ کی طرح تیرتا ہے ۔ نیچے اتھاہ گہرائیوں میں جو سیپیاں موتی ہوتے ہیں ، بطخ کو ان کو علم ہی نہیں ہو پاتا ۔
بانو قدسیہ مردِ ابریشم صفحہ 11

برِ صغیر میں عموماً چار خوبیاں یکجا ہوں تو راوی چَین ہی چَین لکھتا ہے ۔ ورنہ اپنا آپ منوانے کے لیے تقابل کے بیلنے میں اپنی بانہ ڈال کرمحنت کا رس نکلوانا پڑتا ہے ۔   اگر انسان امیر ہو ، انگریزی کے لہجے پر عبور ہو ، گورا چٹا خوبصورت ، اور اونچی ذات والا کہلوائے تو ان چار خوبیوں کے باعث  ہمارے معاشرے میں وہ اڑتا سانپ بن سکتا ہے ۔ اگر دو ایک کوائف کم ہوں تو گھٹتی لڑتا ہے ۔ اور اپنے  آئی  کیو اور محنت کا سہارا لے کر سیلف میڈ آدمی بن جاتا ہے ۔ ہمارے معاشرے میں ایک مدت سے یہ چار تعویذ کام آتے رہے ہیں۔  جس شخص کے پاس ان کی کمی ہو ہمارے معاشرے میں اس کی عزت بحال نہیں ہو سکتی ۔ فقط متّقی ، پرہیزگار ، بے ضرر انسان ہو تو ہمارے معاشرے میں لوگ اسے ایویں کہویں ہی سمجھیں گے ۔ 
بانو قدسیہ  مردِ ابریشم صفحہ 35

برداشت کا امتحان اس وقت ہوتا ہے جب ہم اکثریت میں ہوتے ہیں ۔  اور جرئت کا اس وقت جب ہم اقلیت  میں ہوتے ہیں ۔ 
اشفاق احمد بابا صاحبا  صفحہ 399

میری تائی کہا کرتی تھیں کہ تم لوگوں کے منہ بند نہیں کر سکتے وہ جو چاہیں گے کہیں گے ۔ پھر لوگوں کے ذہنوں پر کسی کا  کوئی کنٹرول نہیں ہوتا  ۔ صرف اپنے ذہن پر ہوتا ہے  اور بیوقوف لوگ اپنے ذہن پر کنٹرول کے بجائے دوسروں کے ذہنوں پر طاقت آزمائی شروع کر دیتے ہیں ۔  جب آپ کو یہ بات سمجھ آ گئی تو پھر آپ کو لوگوں  کی تنقید اور تبصرہ کبھی بھی تکلیف نہیں دے گا ۔

اشفاق احمد بابا صاحبا  صفحہ 514

جب آپ نا خوش ہوتے ہیں ، ناراض اور ناساز ہوتے ہیں ۔ تو ہر شے دھندلی ہو جاتی ہے ۔ نہ باہر کا حسن نطر آتا ہے نہ اندر کا ۔ آوازیں مدھم پڑ جاتی ہیں ، خوشبوئیں ماند ہو جاتی ہیں ۔ بھوک ختم ہو جاتی ہے ۔ لمس ٹھنڈا پڑ جاتا ہے ۔ انسان اپنے آپ میں نہیں رہتا اور کا اور ہو جاتا ہے ۔  تم کو پتہ نہیں چلتا کہ خوف اور اکلاپا آپ کی ذات کے اندر آپ کی روح کو کیسے پژمردہ کر دیتے ہیں ۔ اور اس کی بصیرت پر موتیا اتر آتا ہے ۔

اشفاق احمد بابا صاحبا صفحہ 519

کئی مرتبہ زندگی میں اور زندگی سے زیادہ ایمان کے اندر تضاد نظر آتا ہے ۔۔۔۔ یاد رکھو ایمان ہے ، سائنس نہیں  ۔ ایمان ایک موسم میں آگے بڑھتا ہے  ، دوسرے میں پورے کا پورا پیچھے  چلا جاتا ہے ۔ 
ایک وقت میں تم نمازیں پڑھتے ہو ، عبادت کرتے ہو ، پھر ڈھیلے ہو جاتے ہو ۔  آرام طلبی اختیار کر لیتے ہو ، جھگڑا کرنے لگتے ہو ، منفی ہو جاتے ہو ۔  جس طرح نیگیٹو اور پازیٹو دونوں تاریں مل کر بجلی کا بلب روشن کرتی ہیں ایسے ہی ایمان ہے ۔ اسی طاقت سے رخ موڑے جاتے ہیں ، پہاڑ کاٹے جاتے ہیں ۔ جب تم رکوع میں جاتے ہو ، سجدے میں جاتے ہو  سبحان ربی الاعلیٰ کہتے ہو  اور خدا سے اس علم کی بھیک مانگتے ہو کہ مجھے ایمان کے اندر رہ کر حرکت نصیب ہو تو پھر تمہارے سارے تضاد حق بن جاتے ہیں اور ساری تخریبیں تعمیریں ہو جاتی ہیں ۔

اشفاق احمد بابا صاحبا  صفحہ 524

بڑائی اور برتری کی اپنی اپنی قسمیں ہیں ۔ جب ہم بڑائی کا سوچتے ہیں تو کچھ حاصل کرنے کے حوالے سے سوچتے ہیں۔ جب انبیاء بڑائی  کی سوچتے ہیں تو کچھ عطا کرنے کے حوالے سے سوچتے ہیں ۔ جب میں بڑائی کے حصول کی کوشش کرتا ہوں تو نوکر چاکر ، خدام ادب اور مال و دولت اور محل ماڑی کو حاصل کرنے کی طرف لپکتا ہوں ۔ لیکن جب نبی بڑے ہونے کا اظہار کرتے ہیں تو فرماتے ہیں ! پیاری بیٹی تو نے نوکر چاکر ، غلام اور لونڈی لے کر کیا کرنا ہے ، میں تمہیں ایک ایسا وظیفہ نہ بتا دوں جو تمہیں ہر مشکل پہ آسانیاں عطا کرتا رہے ۔ 
اشفاق احمد بابا صاحبا صفحہ 491

خیرا گلی میں میرا ایک چھوٹا سا گھر تھا ۔ اس کے دو کمرے تھے ۔ ہم کبھی کبھی وہاں جاتے تھے ۔ جب کبھی وہاں جاتے تو آتے وقت اس کی دیکھ بھال غلام قادر کو سونپ دیتے ۔ وہ وہاں ڈاکخانے میں ملازم بھی تھا ۔ میری بیوی نے چابیاں دیتے ہوئے اسے کہا کہ " غلام قادر سردیاں آنے سے پہلے یا سردیاں آنے کے بعد چیزیں گھر سے باہر نکال کر انہیں دھوپ لگا لینا " ۔ اس نے کہا کہ " بہت اچھا جی "۔  غلام قادر نے وہ چابی لے کر ایک دوسری چابی بانو قدسیہ کو دی تو اس نے پوچھا کہ یہ کیا ہے ؟ وہ کہنے لگا کہ یہ جی میرے گھر کی چابی ہے جب آپ نے اپنے گھر کی چابی مجھے دی ہے تو میرا فرض بنتا ہے میں اپنے گھر کی چابی آپ کو دے دوں ۔ کوئی فرق نہ رہے ۔ آپ مجھ پر اعتماد کریں اور میں نہ کروں یہ کیسے ممکن ہے۔ میری بیوی اس کی بات سن کر حیران رہ گئی ۔  خواتین و حضرات ! یہ وہ لوگ ہوتے ہیں جن کو اللہ نے ایسی عزت عطا کی ہوتی ہے کہ وہ عزت سے محروم نہیں ہوتے اور کہیں سے چھینا جھپٹی کر کے اکٹھی نہیں کرتے ۔

اشفاق احمد زاویہ 2 چیلسی کے با عزت ماجھے گامے  صفحہ 197

دعا قلندری یہ ہے ! یا اللہ شیطان اور شرارت سے محفوظ رکھیو ۔ رحمت سے محروم نہ رکھیو ۔ 
اشفاق احمد بابا صاحبا  صفحہ 631

زمانے نے عجب پلٹا کھایا ہے ۔ پچھلے لوگ چھپ کر عبادت اس لیے کرتے تھے کہ کہیں شہرت نہ ہو جائے اور اب اس لیے چھپا کر کرتے ہیں کہ کہیں لوگ مذاق نہ اڑائیں۔

اشفاق احمد بابا صاحبا  صفحہ 615

ہم لوگوں کی ، اوروں کے چھوٹے چھوٹےعیوب پر نظر ہے ۔ اور اپنے بڑے بڑے عیوب دکھائی نہیں دیتے ۔ اپنے بدن پر سانپ بچھو  لٹک رہے ہیں ،  ان کی پرواہ نہیں ۔ اور ہم دوسروں کی مکھیاں اڑانے کی فکر میں ہیں ۔
اشفاق احمد بابا صاحبا صفحہ 615

انسان کو چاہیے کہ خود کو مستقل نہ سمجھے بلکہ یہ خیال کرے کہ میں دیارِ غیر میں ہوں ۔ اور یہ بھی بات دل میں نہ لائے کہ فلاں حالت میں ہوتا تو بہتر تھا ۔ اس  کے بر عکس رضا و تسلیم اختیار کرنا چاہیے ۔  ورنہ پریشانی بڑھتی ہے ۔
جیسے  بیل بندھا ہوا ہو ، وہ اپنے آپ کو جس قدر کھینچے گا اور زور لگائے گا ، گلا اور پھنسے گا ۔  اور جس قدر کھونٹے کے قریب ہوگا ، راحت پائے گا ۔ انسان کو بھی یہی خیال کرنا چاہیے ۔
اشفاق احمد بابا صاحبا صفحہ 609

ہمارے ایک دوست تھے ۔ بہت بڑے طبیب اور بہت بڑے طبیب خانوادے کر فرزند ۔ شاعر بھی تھے اور جوہر شناس بھی ۔ باتیں بہت خوبصورت کرتے تھے ۔ ان میں تجربہ بھی ہوتا اور مطالعہ بھی ۔ منطق بھی اور لوک دانش بھی ۔ ان کا نام جمال سویدا تھا اور میں اکثر ان کی محفل میں شریک ہوتا تھا ۔  چونکہ وہ ایک بڑے جوہری تھے اور ہیروں کے اندر باہر ، ذات اور صفات کا علم رکھتے تھے ۔ اور ان کے مزاج اور اثرات سے واقف تھے ۔ اس لیے ان کی باتیں سن کر اور بھی حیرانی ہوتی ۔  جمال سویدا صاحب نے بتایا کہ اگر بڑے ہیروں کے ساتھ چھوٹے اور کم قیمت ہیروں کو ایک مخصوص تھیلی میں ڈال کر رکھا جائے تو کم قیمت اور چھوٹے ہیروں میں بھی بڑے ہیروں جیسی صفات پیدا ہو جاتی ہیں ۔ جن کے اندر کوئی رنگ نہیں ہوتا ان میں بڑے ہیروں کی رنگت کا بھی مستقل چلن پیدا ہو جاتا ہے ۔  ہمارے گاؤں میں ایک اندھا فقیر صبح سویرے ایک صدا لگاتا ہوا گذرا کرتا تھا ۔ " اٹھ فریدا ستیا تے  اٹھ کے باہر جا ، جے کوئی بخشیا مل گیا تے توں وی بخشیا جا " ۔  مجھے اس وقت اس کی بات بڑی بے معنی لگتی تھی ، لیکن جمال سویدا کی گفتگو کی بعد اور ہیروں کی آپس میں صحبت کے بعد یہ…

انسان کا وجود مٹی کا دیا ہے ، اس میں مٹی بھی ہے اور روشنی بھی ۔ اگر توجہ صرف مٹی پر رہیگی تو زندگی بیکار ہو جائیگی ۔ لازم ہے کہ روشنی پر بھی توجہ رہے ۔ جونہی روشنی کی طرف توجہ ہو گی سب کچھ عیاں ہو جائےگا ۔ 
اشفاق احمد بابا صاحبا صفحہ 585

ایک بات یاد رکھو امیر ہونا کوئی گناہ نہیں ہے ۔ بالکل نہیں ، ہر گز نہیں ، البتہ کشادہ دل اور فیاض نہ ہونا گناہ ضرور ہے ۔  اشفاق احمد بابا صاحبا  صفحہ 544

انسان کیا ہے ؟ دیکھنے کو تو دوسرے جانوروں جیسا ایک جانور ہے لیکن اس کو ذہن اور شعور کی دولت عطا ہوئی ہے اور اس دولت نے اسے جانوروں سے الگ کر دیا ہے ۔  اب اس کو سچ ، حق ، جمال ، اور خوب کا سامنا ہوتا ہے ۔ اس کا شعور ان کا سامنا کرتا ہے اور اپناتا ہے ۔ وہ اخلاق  کا اور اخلاقی اصولوں کا پابند ہو جاتا ہے اور جب تک انسان ان چیزوں کا پابند ہے، وہ انسان ہے ۔ اور جب ان سے باہر نکل جاتا ہے تو پھر حیوان ہے ۔

اشفاق احمد بابا صاحبا صفحہ  543