اشفاق احمد

بس عبادت کی اتنی ساری حقیقت ہے بابو لوکا ! عبادت کا بھانڈا تیار ہو ، سائیں کی کرم کی نظر پڑ جائے ، تو باگو باگ ہو جاتا ہے ۔ قیمت وہ ملتی ہے جو سان میں نہ گمان میں ۔ پر جو بھانڈا ہی پاس نہ ہو ۔ ۔ ۔ ۔ ۔تو خالی بندے پر کیا نظر پڑنی ہے ! کدھر سے عطا آنی ہے ! کدھر سے نوازا جاتا ہے ؟ بھانڈا تیار رکھ اور اس کی نظر کی راہ دیکھ ۔ ۔ ۔ ۔ ۔
اشفاق احمد  من چلے کا سودا صفحہ   79

آپ منہ میں روٹی کا ایک لقمہ رکھ کر تین دن گھومتے رہیں وہ آپ کی نشو و نما کا باعث نہیں بن سکے گا جب تک کہ وہ آپ کے معدے میں نہ اتر جائے ۔ اور معدے میں اتر کر آپ کے خون کا حصہ نہ بن جائے ۔ اور پھر آپ کو تقویت عطا ہوتی ہے ۔ میں آپ اور ہم سب منہ کے اندر رکھے علم کو ایک دوسرے پر اگلتے رہتے ہیں ۔ اور پھینکتے رہتے ہیں ۔ پھر اس بات کی توقع رکھتے ہیں اور وسچتے ہیں کہ ہم کو اس سے خیر کیوں حاصل نہیں ہوتی ۔

اشفاق احمد  زاویہ 2 عالم اصغر سے عالم اکبر تک  صفحہ 147

اس میں کوئی شک نہیں کہ غلطی پکڑنا اور غلطی کی نشاندہی کرنا انسانی فطرت میں شامل ہے ۔ لیکن یہ بات بھی ہر حال میں یاد رکھنے کے قابل ہے کہ انسان غلطی بھی کرتا ہے اور ناکام بھی ہوتا ہے ۔ اور اپنی ترقی کے راستہ پہ رک بھی جاتا ہے ۔ لیکن اس ساری کائنات میں صرف خدا کی ذات وہ ہستی ہے جو نہ تو کبھی غلطی کرتی ہے اور نہ ہی کبھی ناکام ہوتی ہے ۔ جو لوگ ہر وقت دوسروں کی غلظیاں پکڑنے میں مصروف رہتے ہیں یا جو اپنی غلطیوں اور کوتاہیوں پر افسوس کرتے رہتے ہیں وہ نعوذباللہ اپنے آپ کو خدا سمجھنے لگ جاتا ہے اور جب ان سے خدا نہیں بنا جاتا تو کہ ایسا ممکن ہی نہیں ہے تو پھر وہ شیطان بن جاتے ہیں ۔ اور اس میں اپنا اور دوسروں کا نقصان کر لیتے ہیں ۔ اشفاق احمد بابا صاحبا صفحہ 417

ہم کو وہی کچھ نصیب ہوتا ہےجس دنیا میں ہم آباد ہیں ۔آپ کے اندر ایک کشش ہے اور وہ ایسی چیزوں کو آپ کی طرف کھینچتی ہےجس کی اس کو چاہت ہوتی ہے ۔ مثل اپنی مثل کو کھینچتی ہے ۔ ۔ ۔ ۔ ۔ ۔یہ قدرت کا ایک اصول ہے ۔ شیر ، شیروں کے ساتھ مل کر رہنا پسند کرتے ہیں ۔ اور گیدڑ ، گیدڑوں کے ساتھ ۔ اگر آپ اپنے آپ کو تبدیل کر لیں گے  تو آپ کی کشش دوسری قسم کی مطلوبات کو کھینچنے لگے گی اور تبدیلی کے لیے وہی اصول ہے جس کا بار بار ذکر ہوا ہے کہ اس نیچر کو ڈھونڈھو جو تمہاری اصل نیچر ہے ۔ وہ نہیں جس کا آپ نے لبادہ اوڑھ رکھا ہے ۔

اشفاق احمد بابا صاحبا صفحہ 505 

جب ہمارا ریڈیو  اسٹیشن نیا نیا بنا تھا تو بارش میں ایک تو اس کی چھتوں پر پانی کھڑا ہو جاتا تھا اور دوسرا کھڑکی کے اندر سے پانی کی اتنی دھاریں آ جاتی تھیں  کہ کاغذ اور ہم خود بھی بھیگ جاتے ۔ ایک روز ایسی ہی بارش میں ہم سب بیٹھ کر اس کو تعمیر کرنے والوں کو صلواتیں سنانے  لگے  کہ ایسا ہی ہونا تھا ۔ بیچ سے پیسے جو کھا لیے ہوں گے وغیرہ وغیرہ ۔ ہمارے ساتھ  ہمارے ایک ساتھی قدیر ملک وہ صوتی اثرات کے ماہر تھے ۔ وہ سائیکل بڑی تیز چلاتے تھے ۔ دبلے پتلے آدمی تھے ۔ وہ تیز بارش میں سائیکل لے کر غائب ہو گئے ۔ ان کے گھر میں پرانا کنستر کا ایک ٹکڑا پڑا تھا ۔ وہ اسے لے آئے اور چھت پر اسے ٹیڑھا کر کے ایک اینٹ نکال کر فکس کر دیا ۔ اس طرح پر نالہ بن گیا ۔ اور چھت کا اور بارش کا پانی کمرے میں آئے بغیر شرر شرر ۔ ۔ ۔ ۔ ۔ ۔ ۔ کرتا باہر گرنے لگا ۔ ہم نے کہا کہ بھائی یہ کیا ہوگیا ابھی بوچھاڑ اندر کو آ رہی تھی تو قدیر ملک کہنے لگا پتہ نہیں کیا ہوگا مگر اب تو ٹھیک ہو گیا ۔  بیٹھ کر اب اپنا کام کرو ۔ 
اشفاق احمد  زاویہ  سائیکو اینالسس صفحہ 84

آخر کار یہ بات پایہ ثبوت کو پہنچی کہ کوئی شخص اس وقت تک رشوت نہیں لے سکتا  جب تک کہ وہ اپنے آپ کو خوار ، ذلیل ،  پریشان اور زبوں حال نہ سمجھے ۔ پہلے اپنے دل اور اپنی روح کے نہاں خانے میں انسان اپنے آپ کو ذلیل، کمینہ ،چھوٹا اور گھٹیا سمجھتا ہے اس کے بعد وہ رشوت کی طرف ہاتھ بڑھاتا ہے ۔

 اشفاق احمد زاویہ 2 رشوت  صفحہ  113   

اگر کوئی گروہِ انسانی اپنے آپ کو تلاش کرنا چاہتا ہے اور راست روی پر قائم ہونا چاہتا ہے تو پھر اسے اپنا تجزیہ کرنا پڑے گا ۔ میں اپنا تجزیہ کرنے کے لیے بڑا زور لگاتا ہوں ، مگر کر نہیں پاتا ۔  حالانکہ دوسرے کا تجزیہ فوراً کر لیتا ہوں ۔ میں ایک سیکنڈ میں بتا دیتا ہوں کہ میرے محلے کا کونسا آدمی کرپٹ ہے ۔ میرے دوست میں کیا خرابی ہے ۔ لیکن مجھے اپنی خرابی نظر آتی ہی نہیں ۔ میں نے بڑا زور لگایا ہے بڑے دم درود کروائے ہیں  نفسیاتی تجزیہ کروایا ہپناٹزم کروایا کہ میرا کچھ تو باہر آئے مجھے اپنی خامیوں کا پتہ چلے ۔ مجھے لگتا ہے کہ میں تو ایک بہت سمجھدار عاقل فاضل ہوں ۔ مجھ سے زیادہ دانشمند آدمی تو ہے ہی نہیں ۔ اگر آپ مطالعہ کریں اور کھلی نظروں سے دیکھیں تو آپ پر یہ کیفیت عجیب و غریب طریقے سے وارد ہوں گی کہ بندہ اپنے آپ کو کیسا سمجھتا ہے اور اصل میں ہوتا کیا ہے ۔
اشفاق احمد زاویہ 2 سائیکو اینالسس صفحہ 83

سوال : درویش ، فقیر اور صوفی میں کیسے امتیاز کیا جائے ؟ ۔  جواب : جس کا لباس  حضور ﷺ  کی اتباع ہو وہ درویش ہے ۔ جسے فاقہ، قناعت اور ریاضت کا شرف ہو وہ فقیر ہے ۔ اور جو خلوت و جلوت میں صاف ہو اپنے ساتھ بھی ، اللہ کے ساتھ بھی وہ صوفی ہے ۔ یہ سب پاک جماعت کے افراد کے نام اور مقام ہیں ۔ 
اشفاق احمد بابا صاحبا صفحہ 626

جوگ کا پہلا قدم تب اٹھے گا جب غصے کو ختم کرے گا ۔ ۔ ۔ ۔ ۔ ۔ ۔ ۔ غرور تکبر راکھ بنا کر ، حکم حکومت داؤ پر لگا دے گا ۔ ۔ ۔ ۔ ۔ ۔ یہ رنگ اتار پھینک تب جوگ کی سوچنا ۔

اشفاق احمد من چلے کا سودا صفحۃ 13

صوفی لوگ کہتے ہیں  کہ اگر صوفی ازم  کا علم  حاصل کرنا ہو تو صوفیوں سے میل ملاپ رکھنا چایے ۔ کتابوں سے اور بات چیت سے اور لیکچروں سے یہ علم  حاصل نہیں ہو سکتا ۔ محبت کرنے کے لیے ایک محبوب ہونا چاہیے ۔ ایک محبت کرنے والا درکار ہے ۔ کتاب کے ذریعے آپ محبت کا سبق نہیں پڑھ سکتے کیونکہ اس کا تعلق دماغ سے نہیں دل سے ہے ۔ سائنس اور ٹیکنالاجی حساب اور اکنامکس گرامر اور زباندانی دماغ سے تعلق رکھنے والے علم ہیں ۔ یہ کتاب کے ذریعے یا سمعی و بصری آلات کے ذریعے حاصل ہو سکتے ہیں ۔ لیکن دل کی باتیں دل کے اپریٹس پر ہی موصول کی جا سکتی ہیں ۔ اگر ان کو جاننے کے لیے دماغ کا آلہ استعمال کیا جائے تو شارٹ سرکٹ ہو جاتا ہے ۔ پھر انسان کے اندر ایسا اندھیرا چھا جاتا ہے کہ بڑی سے بڑی روشنی بھی وہاں اجالا نہیں کر سکتی ۔

اشفاق احمد بابا صاحبا 380

کاغذ پر دی ہوئی چیز اور لکھی ہوئی چیز اور کاغذ پر کیا ہوا دعویٰ انسان کا دعویٰ نہیں ہوتا ۔ وہ قابلِ اعتبار نہیں ہوتا اس سے پھسلا بھی جا سکتا ہے ۔ جب تک انسان اس دعوے یا وعدے پر اندر سے قائل نہیں ہوگا تب تک کاغذ پر کیے ہوئے وعدے ہیں تو ٹھیک ، تاریخی اعتبار سے لیکن ان سے پھسل جانے کا اندیشہ موجود رہتا ہے ۔
ماضی کی زندگی میں جتنے بھی جھگڑے انسانوں میں ہوتے رہے ہیں وہ سارے کہ سارے اس وجہ سے ہوئے کہ انہوں نے عہد سے رو گردانی کی اور وہ عہد سے پھر گئے ۔

اشفاق احمد زاویہ 3  پچاس برس پہلی کی دعا صفحہ 101

دعا لفظوں کے ساتھ مانگی جاتی ہے لیکن جب آپ کسی کے لیے " وش ویل "  نیک خواہشات کے اظہار کے طور پر کریں آرزو اچھی رکھیں اور آپ کسی کو کہہ دیں غلام  محمد  بڑا اچھا آدمی ہے اللہ اس کو بھاگ لگائے چاہے آپ کسی کو بے خیالی میں کہہ دیں پھر کوئی وجہ نہیں ہے کہ آپ کی وہ دعا قبول نہ ہو ۔

اشفاق احمد زاویہ 2  " وش ویل " صفحہ 49

اگر آپ ، جو کچھ آپ کے پاس ہے ۔اس میں سے حصہ بٹا سکیں تو آپ ایک دم سے عدم اور نامعلوم دنیا کے وی، وی آئی ، پی بن جاتے ہیں ۔ وہاں آپ کا ایک مقام مقرر ہو جاتا ہے ۔ اِس دنیا میں چاہے آپ فقیر  ہوں ، بے نوا ہوں ، گداگر ہوں وہاں آپ کے سر پر تاجِ شاہانہ رکھ دیا جاتا ہے ۔ 
اشفاق احمد بابا صاحبا صفحہ 589